ROXAS CITY – Hugot nga ipatuman ang ‘No Face Shield, No Ride’ Policy sumugod sa Agosto 15, 2020 sa Roxas City Integrated Transport Terminal.
Ini ang ginpahayag ni terminal administrator Mr. Victor Arcenas sang mainterview sang Bombo Radyo.
Kasunod ini sang mandu sang Department of Transportation (DOTr) nga ‘mandatory’ nga pagsuksok sang face shield sang mga pasahero sa mga pampubliko nga salakyan.
Suno kay Arcenas nga may mga katapo sang nasambit nga terminal nga magalibot para sa hugot nga implementasyon sang nasambit nga pagsulundan.
Mangin ang mga drivers ukon mga konduktor ang obligado man nga magsuksok sang face shield.
Wala man suno diri sang multa ukon penalidad ang indi magsunod sa nasambit nga mandu apang indi gid sila pagpahanugutan nga makasakay sa mga pampubliko nga salakyan.
Nag-apelar man ini sa mga commuters nga magkooperar kag magsunod sa amo nga mandatu bangud para man ini sa pag-amlig sa ikaayong-lawas sang tanan batuk sa balatian nga coronavirus disease (COVID-19).
