Ginpaguwa na sang Department of Trade and Industry (DTI) ang price guidelines para sa Noche Buena Products nga kun sa diin mahimo nga mangin mabakal sa nagahilapit nga holiday season.
Sa interview sang Bombo Radyo kay Ms. Ken Quennie Cuñada, Provincial Director sang DTI-Capiz, ginapahayag nga ang iban nga mga panakot may pagsaka ang presyo.
May ara man nga mga panakot ang nagnubo ang presyo kag may ara man nga wala sang pinag-bag-o.
Dugang pa sini, ang price guide nga ila ginpaguwa ang epektibo na ukon indi na mabag-o pa tubtub sa Disyembre 31 sini nga tuig.
Mahibaluan nga ginakalakipan sang Ham, Keso de Bola, Fruit Cocktail, Cheese, Sandwich Spread, All Purpose Cream, Mayonnaise, Pasta, Elbow Macarano, Salad Macaroni, Spaghetti Sauce kag Tomato Sauce ang yara sa Noche Buena Price guidelines nga ginapatuman sa karon sang DTI.
Panugyan ni Cuñada sa mga consumer, nga kun mahimo nga mamakal na sang temprano pa agud indi na mag-abot sa punto nga posible magkulang ang balaklon sa mga supermarkets kag mapilitan na ini sila nga magbakal sa mga retail stores kun sa diin lain na ang presyo.
Para naman sa mga manugbaligya, ilabi na sa mga supermarkets, suno kay Cuñada kun tani indi sila magpasobra sa presyo kun sa diin may yara na sang sulundan kag indi na ang mga ini maglapas pa.
