Roxas City – Nagpatigayon ang National Telecommunications Commission (NTC) Region VI kaupod ang pila ka mga telco companies sang facilitated Sim registration sa pila ka mga kabanwahanan sa probinsya sang Capiz.
Sa interview sang Bombo Radyo kay Engineer Leah D. Doromal OIC Regional Director sang NTC VI ginpahayag sini nga pina-agi sa bulig sang mga nagkalain-lain nga mga LGU natigayon ang ila aktibidad.
Suno kay Doromal, nga wala sang bayad ang pagparehistro sang SIM Number kag indi kinahanglan nga may yara sang load kag indi man makabuhin sa data sang mga konsumedor.
Mahibaluan kahapon nga adlaw Marso 1 nagpadulong ang katapo sang NTC kaupod ang pila ka mga telco companies sa banwa sang Maayon sa diin masobra 500 nga mga pumuluyo ang natigayon nga maparehistro ang ila nga SIM Number kag sunod naman nga magpadulong sa banwa sang President Roxas nga pagahiwaton sa Civic Center kag sa Marso 3 naman sa banwa sang Panay nga pagahiwaton sa Panay Civic Center.
Tinutuyo sang amu nga aktibidad agud mabuligan ang mga pumuluyo nga magparehistro sang ila mga SIM Numbers ilabi na ang mga Senior Citizen kag mga nagagamit sang keypad nga cellphone.
Samtang ginklaro man ni Doromal nga tubtob lamang sa Abril 26, 2023 ang deadline sang SIM registration sandig sa natalan nga layi.
Matandaan nga ang mandatory sang SIM registration ang nagsugod sadtong Disyembre 27,2022 kag naglawig lamang sang 180 diyas.
