ROXAS CITY – Istrikto nga ginapatuman sang Philippine Coastguard (PCG-Roxas) ang memorandum circular angut sa Safety and Security Environmental Numbering System.
Ginpahayag ni Lt. Commander Edison Diaz, station commander sang PCG-Roxas nga tuyo sini nga madali ma-identify ukon makilala ang mga water craft ukon sakayan nga nagahimo sang iligal nga aktibidad.
Suno kay Diaz nga ang nasambit nga circular ang isa ka sahi sang monitoring system sa diin ginapahamtangan sang numero ang mga lokal nga mga sakayan agud matumod kun gikan sila sa Capiz.
Samtang ginklaro ni Diaz nga wala sang ginabayaran nga fees sa PCG ang tag-iya sang mga sakayan ukon motor banca, bangud sa munisipyo sila nagabayad.
Pananglitan may yara sang miyembro sang PCG-Roxas nga magpanukot, magkontak lamang sila sa talatapan, agud ini ang maaksyunan.
Ginpanindugan man sini nga importante nga maparehistro ang tanan nga sakayan bangud kun indi ini rehistrado sa mga munisipyo makunsidera ini nga kolorum.
