Padayon pa nga nagataas ang numero sang mga napatay nga indibidwal sa pagpanglaslas sang bagyo nga Yagi sa pila ka mga pungsod sa Southeast Asia.
Base sa datos nga ginpaguwa sang ASEAN Coordinating Center for Humanitarian Assistance, masobra 500 ka indibidwal na ang napatay bangud sa mga pag-ulan, pagbaha kag pagtiphag sang duta kag mga establishimento kasunod sang pagpanglaslas sang bagyo.
Sa Vietnam, nabalhag ang pinakamadamo nga numero sang mga napatay nga nagdangat na sa kapin 300 ka indibidwal.
Sa Myanmar, nabalhag na man ang 226 ka indibidwal ang napatay samtang nagapabilin naman nga missing ang kabug-usan nga 77 ka indibidwal.
Sa Thailand naman, nagdangat sa 42 ka indibidwal ang kumpirmado nga napatay, 21 sa Pilipinas, kag apat naman sa Laos.
Suno pa sa ahensiya, minilyon ka mga indibidwal ang nabalhag nga apektado sa pag-agi sang nasambit nga bagyo kun sa diin sa Myanmar pa lamang, nagdangat na sa 3.4 ka indibidwal ang gin-evacuate.
Bisan pa nga sang nakaligad nga semana pa nagpanglaslas ang nasambit nga bagyo, nagtuga ini sang malawig nga mga pagbilinaha sa nagkalain-lain nga bahin sang mga nasambit nga pungsod kag ginsundan man sang mga monsoon rain.
Tubtob sa karon, ginapangita sa gihapon ang pila ka indibidwal nga una na nga nabalita nga missing.
Pila ka mga importante nga istruktura naman ang nasamad kasubong sang mga karsada, tulay, power tower, kag mga telecom tower, kaupod na ang nilibo nga mga religious building, buluthuan, kag mga government offices.
