Nagnubo ang numero sang mga Filipino nga wala sang trabaho sang Setyembre 2025 sandig sa pinaka-ulihe nga Labor Force Survey sang Philippine Statistics Authority (PSA).
Nagikan sa 2.03 million sang Agosto 2025, nagnubo ini sang 1.96 million sang Setyembre.
Apang ginpahayag ni PSA Chief at National Statistician Claire Dennis Mapa, mas mataas sa gihapon ini kun ipaanggid sa 1.89 million nga narekord sa kaangay nga bulan sang nagligad nga tuig.
Narekord ang unemployment rate sa 3.8%, buot silingon, 38 sa kada 1,000 ka tawo sa labor force ang wala sang trabaho ukon Negosyo.
Mas manubo ini kun ipaanggid sa 3.9% sang Agosto 2025, apang may pagtaas ini sa 3.7% sang Setyembre 2024.
Samtang, nagnubo man ang labor force participation rate ukon numero sang mga Filipino nga may trabaho ukon aktibo nga nagapangita sang trabaho.
Humalin sa 65.1% sang Agosto, nagnubo ini sa 64.5% sang Setyembre 2025, kag mas manubo man sa 65.7% nga narekord sang Setyembre 2024.
