Nagnubo sa 450,000 ang numero sang mga suldado sang pungsod suno sa Ministry of National Defense sang South Korea nga nabuhinan sang 20% sa nakaligad nga anum ka tuig.
Ginatudlo sang mga otoridad ang padayon nga pagnubo sang birth rate bilang mayor nga rason, nga sa karon yara na lamang sa 0.75 births kada babaye, ang pinakamanubo sa kalibutan.
Mandatory gihapon ang serbisyo militar sa South Korea bangud wala pa pormal nga natapos ang inaway sini sa North Korea, nga may ginabanta nga 1.3 milyones ka aktibo nga soldado.
Suno sa isa ka pagtuon, ang South Korea nagakinahanglan sang indi magnubo sa 500,000 ka mga soldado agud epektibo nga mapangapinan ang kaugalingon gikan sa posible nga pag-atake sang North Korea.
Sa padayon nga pagnubo sang mga numero, ang mga eksperto nagasiling nga ang pungsod yara sa “mabudlay nga posisyon” kon parte sa pungsodnon nga depensa.
Sugod sang 2006, ang numero sang mga dibisyon militar ginbuhinan man halin sa 59 pakadto sa 42, bilang resulta sang pagtingub ukon pagbungkag sang pila ka mga yunit.
Bilang sabat, ang badyet sa depensa sang pungsod padayon nga nagtaas. Sini nga tuig, naglab-ot sa kapin sa $43 bilyones ang gasto sang gobyerno sa militar, masobra sa bug-os nga GDP sang North Korea.
Bisan pa nga ang serbisyo militar mandatory para sa mga lalaki, ang sistema nagapabilin nga kontrobersyal, ilabi na bangod sang epekto sini sa karera sang mga pamatan-on.
Ang pila ka mga konserbatibo nagapanawagan man nga ang mga kababainhan ilakip sa conscription sa tunga sang krisis sa populasyon.
