ROXAS CITY – Masadya nga ginpakigbahin sang OFW sa Japan nga nagpatigayon sila sang Philippine Expo sang nakaligad nga Hunyo 10 tubtob 12.
Sa interview sang Bombo Radyo kay Bombo International Correspondent Josel Palma sa Japan, ang Philippine Expo ang ikaduha sa pinakadako nga event sang mga Pinoy sa pungsod Japan kag ginahiwat kada tuig kun sa diin ginatambungan ini sang kadam-an kalakip ang OFW’s, Japanese, kag iban pa nga mga nasyunalidad.
Pahayag sini, ang nasambit nga event ang nagapromote sang kultura sang Pilipinas kag nagapabaskog sang maayo nga relasyon sang duwa ka pungsod.
Madamo suno diri ang mga aktibidades kapareho sang Karaoke challenge, Miss little Expo, Miss Gay Competition, Cosplay, Miss Expo, kag iban pa kag nagtambong man ang ila invited celebrity guests nga sanday Andew E. kag Andrea Torres.
Kadungan sang ila event sang Hunyo 12 ang komemorasyon sang ika-124th Idependence day sang Pilipinas kun sa diin yara ang representante sang Department of Tourism Phillipines kag Japanese representative kun sa diin naghatag ang mga ini sang speech.
Dugang pa ni Palma, maayo ang pagtratar sa ila sang mga hapon kag nagpasalig man ang OWWA sa ila nga mga OFW’s sa Japan nga madamo ang mga programa para sa ila kag gapangayo lamang sa ila ang ahensiya sang 25 dollars membership fee sa sulod sang duwa na katuig kag maangkon nila ang nagkalain-lain nga benepisyo.
