Nakabatyag sang kabalaka ang pila ka mga OFWs sa Middle East matapos maghatag sang 48 ka oras nga ultimatum si US President Donald Trump sa Iran agud buksan ang Strait of Hormuz, isa ka kritikal nga alagyan sang mga barko nga nagadala sang langis sa bug-os nga kalibutan.
Sa interview sang Bombo Radyo Roxas kay Ana Majinon, International Correspondent, direkta sa Qatar, iya ginpahayag nga dako gid ang epekto sang sitwasyon indi lamang sa Middle East kundi pati sa global economy bangod ang Strait of Hormuz ginakabig nga isa sa pinaka-importante nga oil routes sa kalibutan.
Dugang pa ni Majinon, bisan ginpabutyag sang Iran nga ginapahanugutan gihapon ang paglabay sang iban nga barko, ginlimitahan naman nila ang mga vessels nga ginakabig nila nga “enemy nations,” lakip na ang Estados Unidos sang America kag Israel.
Nahibaluan nga nagpaandam man ang Iran nga kun padayunon sang US ang pag-atake sa ila energy infrastructure, mahimo nila ini nga sabton pinaagi sa pagtarget man sang mga imprastraktura sang US kag mga kaalyado sini sa rehiyon.
Pahayag pa niya, padayon man ang hugot nga seguridad sang pungsod Qatar sa pagbantay sa tion nga may magluntad nga kinagamo sa pagpamahog.
Nagpahanumdom man ang natungdan sa mga OFW nga kaangay niya mangin aligmat sa palibot, magsunod sa mga abiso sang gobyerno, kag magkuha lamang sang impormasyon gikan sa opisyal kag lehitimo nga mga sources.
