Ginkumpirmar sang grupo nga mga mangingisda nga PAMALAKAYA nga nagla-ot na sa mga baybayon nga sakop sang Tanza sa Cavite ang oil spill nga nagikan sa MT Terra Nova.
Suno sa grupo, natalupangdan sang mga residente sa lugar kag mga mangingisda ang ‘distinct’ nga baho nga masami nagaguha sa tion nga may oil spill.
Bangud sini, ginakabalak-an nga magalab-ot sa 5,000 nga mga mangingisda ang maapektuhan sa Tanza pananglitan nga indi gilayon ma-contain ang naglapta nga langis.
Dugang pa sini nga mahimo ini maka-contaminate sa mga isda sa dagat, kag maka-apekto man sa ila pangabuy-anan.
Sa pahayag ni PAMALAKAYA vice chairperson Ronnel Rambulo ginsiling sini nga kinahanglan gilayon ini nga masolusyunan ilabi na nga wala pa makabangon ang mga mangingisda nagikan sa epekto sang Bagyong Carina kag Habagat.
Samtang, magapatigayon naman sila sang on-site inspection agud matumod ang kalawigon sang oil spill.
