Daan nga hiligut-anon ang isa sa mga motibo nga ginalantaw sang mga kapulisan sa pagpangluthang sa isa ka lalaki Sitio Intadtaran, Barangay Bilao, Sapian, Capiz.
Ang biktima amo si alyas Bert samtang ang suspek naman amo si alyas Sansan, 57 anyos, lunsay residente sang nasambit nga lugar.
Sa interview sang Bombo Radyo kay Police lieutenant Steve Ian Bautista, hepe sang Sapian Municipal Police Station, iya ginpahayag nga may nagreport sa ila station nga may yara sang shooting incident.
Gilayon naman sila nagresponde kag pag-abot sa lugar nakita na lamang ang biktima nga nakahandusay nga may igo sang bala sa likod nga porsyon sang iya lawas.
Suno kay Bautista, gilayon nga gindala sa hospital ang biktima apang gindeklara nga dead on arrival sang attending physician.
Samtang gilayon naman nga na-aresto ang suspek sa hot pursuit operation kag sa subong, detained na ini Sapian Municipal Police Station para sa nagakaigo nga disposisyon.
