Miyembro na sang Philippine Navy Reserve Force ang 2-time Olympic gold medalist nga si Carlos Yulo.
Opisyal nga nanumpa si Yulo bilang Petty Officer 1st Class sa headquarters sang PH Navy.
Suno sa Pinoy Gymnast, proud ini nga mahatagan sang nasambit nga pribilehiyo nga ma-enlist sa PH Navy Reserve Force, isa ka pagkilala nga wala nya suno diri ginalauman.
Dugang pa ni Yulo nga ginkasadya sini ang pagsuksok sang uniporme sang PH Navy kag ginpasalamatan man sini ang Navy para sa prestihiyoso nga pagkilala. Dugang pa sini nga iya nga i-uphold ang core values sang Navy kag mangin inspirasyon sa mga kabataan nga ipakita pinaagi sang sports.
Sa isa ka mensahe naman nga ginpaabot ni Philippine Navy Flag Officer in Command, Vice Adm. Toribio Adaci Jr., gindayaw sini ang golden boy kag nagsiling nga kumpiyansa ini nga pagahimuon man ni Yulo bilang isa ka reservist ang ginpakita sini nga dedikasyon, disiplina kag drive para mangin kampeon sa world stage, kaupod ang mga kababainhan kag kalalakinhan sang PH Navy nga nagahalad sang ila nga kabuhi agud protektahan ang pungsod.
Matandaan nga nakuha ni Yulo ang 2 ka medalya sa floor exercise kag vault apparatus sa Gymnastics sa 2024 Paris Olympics.
