Ginpahayag sang Office of the Ombudsman nga target nila nga mapasaka sini nga semana ang kaso nga plunder batuk kay Senator Jinggoy Estrada may kaangtanan sa ginapatihan maanomalya nga flood control projects.
Suno kay Ombudsman Jesus Crispin Remulla, pirmahan niya ang information batuk sa senador antes ini isumiter sa Sandiganbayan, nga ginapaabot nga mapasaka sa Huwebes.
Magluwas sa plunder, lakip man ang iban pa nga may kaangtanan nga kaso.
Nauna na nga nagrekomendar ang Department of Justice sang pagpasaka sang plunder, graft, kag direct bribery charges batuk kay Estrada kag pila ka opisyal, lakip si anay Public Works Secretary nga si Manuel Bonoan.
Ginpaathag ni Remulla nga may gamay nga delay sa pagpasaka sang kaso bangud kinahanglan pa nga usisahon kag klaruhon ang resolusyon agud mangin mas mabakod ang impormasyon nga ihatag sa korte.
Dugang pa sang Ombudsman, may iban pa nga nalakip sa kaso apang ang iban posible nga himuon nga state witnesses bangud importante ang ila testimonya sa imbestigasyon.
Samtang, madasig naman nga ginpanginwala ni Estrada ang anuman nga pagkalakip sa iregularidad kag ginpabutyag sang iya kampo nga wala sang ebidensya nga makakonektar sa iya sa ginapaalegar nga kickbacks.
