ROXAS CITY – Patal nga pilas ang naangkon sang isa ka English Online Teacher, matapos nga ginbuno sang wala pa makilan-an nga persona sa Mejorada Subd., Barangay Inzo, Roxas City.
Ginkilala ang biktima kay Clea Mae Panaligan 36-anyos kag residente sang Mejorada Subd., Barangay Inzo, Roxas City.
Sa impormasyon nga nakuha sang Bombo Radyo sa Roxas City Police Station, ginapahayag nga samtang nagalakat si Panaligan hinali na lamang nga may nagpalapit sa iya nga isa ka lalaki kag pwersahan nga ginkuha ang iya bag samtang nagbato pa ini.
Bangud sini, hinali nga ginbuno ang biktima sang makapila ka beses sa iya natuo nga tyan.
Nataban sang wala makilan-an nga lalaki ang bag sang biktima nga may unod P400,000.00 kag madasig nga nagpalagyo sa wala mahibaluan nga direksyon.
Samtang, nagbalik naman padulong sa iya apartment si Panaligan agud magpangayo sang bulig kag madasig nga ginpadangat sa isa ka pribado nga ospital para sa nagakaigo nga pagbulong.
Sa karun padayon ang ginapatigayon nga hot pursuit operation sang mga otoridad agud madakpan kag makilan-an ang amu nga suspetsado.
