Nangin madinalag-on ang Oplan Paalala: Iwas Paputok sang Bureau of Fire Protection- Roxas City sa pagsug-alaw sang tuig 2026.
Sa interview sang Bombo Radyo kay Senior Fire Officer 1 Junemar D. Galve Chief, Public Information Officer sang BFP Roxas City, iya ginpahayag nga wala sang may nabalhag nga dalagkuan nga insidente sang sunog may kaangtanan sa palupok.
Suno kay Senior Fire Officer 1 Galve, apisar may nagluntad na sunog sang bisperas sang New Year, gilayon man ini nga napalong kag nalikawan ang mas daku nga kahalitan.
Nahibaluan nga yara sa 56 ka mga insidente sang sunog ang nabalhag humalin Enero tubtob Disyembre sang tuig 2025, mas manubo kun ipaanggid sang tuig 2024.
Pahayag pa niya, magapadayon ang ila kampanya sa pagpahibalo kag pagtudlo sang nagakadapat nga butang agud malikawan ang sunog.
Nagpanawagan man ini sa mga pumuluyo nga subong nga tuig 2026, mangin alerto kag responsable sa mga kagamitan sa sulod sang balay kag establisyemento agud malikawan ang mga insidente sang sunog.
