ROXAS CITY – Aprubado na sang city council sa ikatatlo kag ulihi nga pagbasa ang ordinansa nga ginduso ni Hon. Fernando Luis Viterbo kag gintiguluhan “An ordinance requiring commercial establishments along the coastal waters of Roxas City to maintain beach cleanliness ukon “Baybayon ko, limpyuhan ko”.
Sa interview sang Bombo Radyo kay City Councilor Fernando Luis “Bords” Viterbo, Chairman sang Committee on Tourism, Heritage, Culture and Arts, iya ginsiling nga ang nasambit nga ordinsa ang makabulig agud mapabilin ang katinlo sang baybayon sa syudad.
Paga-obligahon ang mga tag-iya sang mga establisyemento malapit sa baybayon nga ipabilin nga matinlo ang ila nasakupan.
Gindesignar naman ang ahensya sang City Environment and Natural Eesources (CENRO) nga amu ang maga-monitor sa mga establisyemento kun sa diin igapatigayon kada 9:00-10:00 sa aga kag 2:00-300 naman sa hapon.
Dugang pa sang konsehal nga mangin business friendly ini sa mga negosyante apang kun maglapas ini sa ordinansa, iga-endorse ini sa CENRO kag magapangatubang sa nagakaigo nga opensiba.
1st offense- written warning
2nd offense- P2,500 nga multa
3rd offense- 5,000
4th offense- suspensyon sang business permit nga indi magnubo sa 15 diyas kag indi magsobra sa 30 diyas
5th offense- ipasarado ang establisyemento
Nagalaom si Viterbo nga sa labing madali nga panahon ma-implementar na ini.
Nagapasalamat siya sa bug-os nga miyembro sang konseho bangud ginsuportohan ang iya ginduso nga ordinansa.
