ROXAS CITY – Aprubado sa ginpatigayon nga special session sang Sangguniang Panlungsod ang taripa ukon pagsuluktan para sa mga indibidwal nga luyag magpaidalom sa Real Time Polymerase Chain Reaction ukon RT-PCR Test sa ginalauman nga pagbukas sang Containerized-Relocatable RT-PCR testing laboratory sa siyudad.
Ini ang ginkompirmar ni City Councilor Midelo Ocampo sang mainterview sang Bombo Radyo.
Suno sa kay Ocampo nga libre ukon wala sang balayran ang mga residente sang siyudad sang Roxas nga ipaidalom sa RT-PCR test.
Apang ginklaro sini nga ang nga indibidwal nga nalakip sa Suspected Case kag high-risk contact gid lamang sandig sa contact-tracing ang mahimo mangin libre sa amo nga test sa nasambit nga laboratory.
Gin-athag man ni Ocampo nga ang mga indibidwal nga magpaidalom sa test kun sa diin ang resulta sini ang pagagamiton sa personal nga transaksyon ang magabayad sang P4,000.
Gindugang pa ni Ocampo nga kinahanglan nga may yara sang basihan nga ordinansa sa pagsukot sa mga indibidwal nga ipaidalom sa test sa nasambit nga facility.
Matandaan nga naghinyo ni Roxas City Mayor Ronnie Dadivas sa mga katapo sang Sangguniang Panlungsod nga magpatigayon sang special session agud maaprubahan ang nasambit nga ordinansa.
