ROXAS CITY – Ginaduso sa karon sa probinsya sang Capiz ang organic farming, ini matapos ang ginpatigayon nga sectoral meeting sang Provincial Agricultural & Fishery Council nga ginhiwat sa Gerry Roxas Foundation Convention Center sa Barangay Dayao sining syudad.
Ginpangunahan sang Department of Agriculture (DA) kag Provincial Agriculture’s Office ang sinapol kag nagtambong man ang mga opisyales nagikan sa nagkalain-lain nga Municipal Agricultural and Fishery Council (MAFC) sa kabanwahanan sa probinsya, kag iban pa sa sektor sang agrikultura kalakip na ang syudad sang Roxas.
Sa interview sang Bombo Radyo kay Board Member Cecilio Fecundo, Chairman sang committee on Agriculture, ginpahayag sini nga ang organic farming ang makabulig agud mahatagan sang kaayuhan ang ikaayong lawas sang pumuluyo sa probinsya.
Gintuad sini nga plano ni Governor Fredenil Castro ang nasambit nga pagsinapol agud madiskusyunan ang mga lihok nga makabulig sa MAFC kag sa iban pa nga sektor sang agrikultura kag asosasyon.
Nagtambong man sanday Vice Governor Jaime Magbanua, SP Members Jose Fulgencio Del Rosario, Thea Faith Reyes, Jonathan Besa, Aldwin Cruz-am, kag Trina Marie Ignacio.
Suno diri, isa sa rason nga ginduso ang organic farming bangud sa nagamahal na ang abuno, ginpahayag nga para ini sa tanan nga pananom kalakip na ang utanon, prutas, palay, mais, amu man sa sektor sang pagpangingisda kag iban pa.
Pinaagi sa organic farming, malikawan ang mga balatian nga dala sang makahalalit nga kemikal nga yara sa fertilizer kag insecticides.
Madamo naman sang kabukiran suno diri ang nakasugod na sang organic farming kag nagalaom si Fecundo nga madugangan pa bangud makabulig man ini ilabi na ang mga puno nga mapahagan-hagan ang pagbaha.
Dugang pa sang opisyal nga sa una lang ini mabudlay apang sa 1 tubtob 3 ka tuig makita na ang maayo nga produkto sang ginkabudlayan kag savings bangud sa wala paggamit sang fertilizer kag insecticide kun sa diin 30-35% ang matipid sa gastos.
Ginatawag man sini ang atensyon sang private sectors nga kun luyag magpangayo sang bulig natuhoy sa organic farming, mahimo magpalapit lamang sa Agriculturist sa kabanwahanan bangud willing ang gobyerno probinsyal nga magbulig.
Ginahinyu ni BM Fecundo sa mga mangunguma, mangingisda, kag sa nagahupot sang kasapatan nga magbuliganay kag suportahan ang komitiba sa sektor sang agrikultura agud malab-ot ang handom ni Governor Castro nga mangin maayo ang ikaayong lawas sang mga pumuluyo sa probinsya sang Capiz.
