ROXAS CITY – ‘Excited’ na si outgoing-governor Antonio Del Rosario sa iya mangin pribado nga kabuhi.
Ini ang kabahin sang nangin mensahe sang gobernador sa iya nga pagbisita sa Sen. Gerardo M. Roxas Memorial District Hospital sa banwa sang Dao kaupod si Hospital Management Unit Head Melanie Arancillo kag Provincial Administrator Michelle Del Rosario.
Ginpahayag sang gobernador nga matapos ang 47 ka tuig nga nangin suluguon ini sang tawo bilang isa ka public servant, nagakalangkag na siya nga ihatag naman ang iya oras sa iya mga kabataan kag mga apo.
Suno pa sa iya nagpangayo naman ini sang pasaylo sa iya mga kabataan bangud sa kapaslawan nga mahatag ang oras sa ila bangud sang kasakuon sini bilang isa ka politician.
Nagalaum naman ang gobernador nga kun anuman ang iya nahatag nga bulig sa ospital sa nasambit nga banwa, mangin mapuslanon ini indi lamang sa banwa sang Dao kundi mangin sa kaiping nga mga kabanwahanan kasubong sang Cuartero, Dumalag, Dumarao kag Sigma.
Ginpahayag sini nga iya gintutukan ang mga programa para sa ikaayong-lawas bangud ini ang labing kinahanglan sang tawo.
May mga natungdan man nga opisina kag ahensiya suno sa iya nga mahimo makatutok sa pagpakaayo sa mga karsadahon.
Kinahanglan suno sa iya mapabatyag sa pumuluyo nga nakahanda ang gobyerno nga magtabang sa ila ilabi na kun sila ang magmasakit.
Ginpasalamatan man sini ang pamunuan sang nasambit nga ospital bangud sang hugot nga koordinasyon agud mapatuman ang handom sini nga programa para sa ikaayong lawas sang pumuluyo.
