ROXAS CITY – Nataban sang foreigner nga lalaki ang P10,000.00 nga para kun tani sa dialysis sang ila amay matapos ginapahayag nga nagpangbudol sa ila baligyaan sang prutas sa Barangay Cagay, Roxas City.
Sa interview sang Bombo Radyo sa anak sang tag-iya nga si alyas “Toto”, ginpahayag sini nga sang natabo ang insidente una nga nagbakal ang foreigner sang isa ka saging kag sunod ini nga naghinyo kung mahimo malantaw ang kwarta sang Pilipinas.
Suno diri wala man sila nagduha-duha nga magpakita sang kwarta sa pagdumdum nga luyag lang sini mahibal-an ang balor sa kada isa.
Mahibaluan liwat nga naghirit ang amu nga dumuluong nga kung may yara sila sang P1,000.00 nga may serial no. PP bangud pagabayluhan ini niya sang $50.
Apang dako ang ila kakibot nga nagdiritso sulod sa kwarto sang ila balaligyaan ang foreigner kag didto ginlantaw ang mga kwarta sa ila kaha kag gulpi lang ini nga naglakat.
Sa pagtsekyar sang iya iloy didto na natalupangdan nga kulang na ang ila kwarta.
Matapos ang insidente, ginpahayag sini nga wala sila naghimo sang aksyon sa kahadlok nga balikan sila sang amu nga foreigner.
Panugyan ni alyas “Toto”, mangin alerto kag indi basta-basta magsalig ilabi na sa mga dumuluong agud malikawan nga mabiktima sang kaangay sini nga istilo.
