Nagpakig-upod ang Department of Migrant Workers (DMW) sa Department of Agriculture (DA) agud matigayon ang bugas sa balor nga P20 kada kilo sa mga overseas Filipino workers (OFWs) kag sa ila mga pamilya.
Suno kay Migrant Workers Secretary Hans Leo Cacdac, ang nasambit nga inisyatibo isa ka katumanan sang promisa ni Presidente Ferdinand R. Marcos Jr. sa iya kampanya nga mangin accessible ang kalidad kag barato nga bugas sang mga pamilya nga Pilipino, samtang ginasiguro nga ang mga lokal nga mangunguma makabaton sang patas nga bayad sa ila patubas.
Ginpahayag ni Cacdac nga ang barato nga bugas ang makuha sa Kadiwa sang Presidente sa DMW Central Office sa Mandaluyong City.
Ang programa sang Kadiwa nga ginapangunahan sang DA nagatuyo nga direkta nga makonektar ang mga konsumidor sa mga mangunguma, mangingisda, kag mga micro-enterprises agud mabuhinan ang market layers nga kinaandan nga nagapataas sang presyo, kag makatuga sang mas inklusibo kag patas nga sistema sang pagpanagtag sang pagkaon bilang kabahin sang agenda sang Bagong Pilipinas.
Gin-engganyo sang Cacdac ang mga konsumidor nga magbakal sang responsable kag magsunod sa distribution guidelines agud masiguro nga ang barato nga bugas makabenepisyo sa madamo nga pamilya.
Samtang, nagabuligay man ang DMW sa DA agud suportahan ang mga OFWs kag ila pamilya nga luyag magsulod sa negosyo sa agrikultura pinaagi sa national reintegration program.
Lakip diri ang paghatag sang technical assistance kag guidance para sa mga OFWs nga nagahandum nga mangin ‘agri-preneurs’.
