Naghatag ang Commission on Elections (Comelec) sang exemption nga P20/kg. rice project sang Department of Agriculture (DA) halin sa election ban sa idalum sang Section 261 (V) sang Omnibus Election Code.
Ang exemption ang nasanto sa Comelec Resolution No. 11060, as amended by Resolution No. 11118, suno sa memorandum nga ginpirmahan ni Comelec Chair George Garcia kag ginpaguwa sang Biyernes.
Ginpahayag sa memorandum nga gin-aprubahan sang komisyon ang hingyo ni Agriculture Secretary Francisco Tiu Laurel Jr. nga i-exempt ang rice initiative, nga nagasuporta sa nagapadayon nga field operations kag rice programs sang DA.
Ang proyekto sa bugas magapadayon tubtub 2028, nga may kabug-usan nga badyet nga P5 bilyones.
Ang exemption may pila ka mga kondisyon: ang implementasyon sini indi dapat makaapekto sa Mayo 12, 2025 snga Nasyonal kag Lokal Eleksyon; ang pagpanagtag sang mga programa sa bulig pinansyal pareho sang ‘ayuda’, TUPAD, AKAP, AICS, kag 4Ps ginadumilian halin Mayo 2 tubtob Mayo 12, 2025; kag ang mga kandidato ukon mga elected officials indi pwede nga magpartisipar sa distribution activities. Kinahanglan nga sundon sang DA ang guidelines sang DSWD kag iban pa nga mga ahensya, magsumiter sang periodic disbursement reports; kag magtugot sang transparency paagi sa media kag public access.
Ang pagbaligya sang P20/kilo nga bugas ang ipatuman sa Visayas sa masunod nga semana, bilang katumanan sang isa ka saad sa kampanya ni Presidente Ferdinand R. Marcos Jr. sa tuig 2022
Sa idalum sang programa, makabakal sang bugas ang mga pigado nga Pilipino sa balor nga P20/kilo.
Suno sa DA, ang tagsa ka pamilya ang pahanugutan nga makabakal sang 10 ka kilo kada semana ukon may kabug-usan nga 40 ka kilo kada bulan.
Ang P20/kilo nga bugas ang ibaligya man sa bug-os nga pungsod sa tion nga matuman ang mga pagpanghangkat sa logistics.
