PANAY, CAPIZ – Duha ka indibidwal nakuhaan sang P268,000.00 bilang total estimated nga balor sang illegal fishing operation sa Panay, Capiz.
Matandaan nga natigayon ang madinalag-on nga operasyon Setyembre 20 sa takna sang 7:25 sang aga.
Ang na aresto ginkilala bilang isa ka boat captain 51-anyos kag crew, 52-anyos kag lunsay residente sang Barangay Casanayan, Pilar, Capiz.
Sa interview sang Bombo Radyo kay Police Captain Eric B Deocampo, Officer in Charge sang Panay, Municipal Police Station, iya ginpahayag narekober bilang ibidensya ang 1 pump boat, 1 Kubota Trio diesel engine, fishing net, kag ginabulubanta nga 15 kilos sang assorted nga isda.
Suno kay Deocampo ang tanan nga nakumpiskar gin-turned over sa Municipal Environment and Natural Resources Office-Local Government Unit Panay para sa nagakaigo nga disposisyon.
Pahayag pa niya paglapas sa Municipal ordinance No. 03-02, Series of 2003, kun sa diin nagagamit sila sang trawl nga wala sang nagakaigo nga dokumento sa pagpangisda.
Sa karon nahibaluan mga nakumpiska nga kagamitan gindala kag ginturn-over sa Municipal Environment and Natural Resources Office-Local Government Unit “MENRO-LGU”, Panay para sa nagakaigo nga pag-disposition, samtang bangud sa nag promisa nga indi na pagliwaton ang illegal nga aktibidad gilayon naman ini release kag ginbalik ang mga kagamitan.
