Posible pa nga makaeksperyensya ang pungsod sang mas manubo nga presyo sang bugas — halin P30 tubtob P40 kada kilo — sa idalom sang administrasyon ni Presidente Ferdinand R. Marcos Jr., suno kay Agriculture Secretary Francisco Tiu Laurel Jr.
Ginhimo ni Laurel ang pahayag bilang sabat sa mga palamangkutanon nahanungod sa posibilidad sang pagnubo sa presyo sang bugas sa P20 kada kilo.
Gintumod sini ang mga epekto sang downward trend sang global rice prices kag padayon nga government interventions.
Tubtob sadtong Enero, ang presyo sang 5 percent broken Vietnam rice ang yara sa USD416 per metric ton (MT), mas manubo sa USD634.5 per MT level sadtong Enero 2023, suno sa Food and Agriculture Organization (FAO) of the United Nations.
Dugang pa sini, nagapadayon ang mga tikang sang gobyerno, kalakip ang mas manubo nga taripa sa imported rice nga 15 percent; pagdeklarar sang food security emergency para sa bugas nga magatugot sa pagbaligya sang rice stocks gikan sa National Food Authority (NFA) sa local government units, government agencies, kag government-owned and controlled corporations (GOCC); pagtalana sang maximum suggested retail price (MSRP) sa P55/kg. para sa 5 percent broken imported rice; kag pagpanubo sa Rice for All (RFA) prices sang P2 tubtob P3 sa Kadiwa ng Pangulo (KNP) Centers kag kiosks.
