Yara sa kabug-usan nga P40-million pesos ang balor sang bulig nga ginhatag ni Presidente Ferdinand Marcos Jr. sa probinsya sang Batanes nga naapektuhan sang bagyong Julian.
Ginsiling ni Presidente Marcos nga yara sa P15 million ang una nga ginpanagtag nga halin kay House Speaker Martin Romualdez samtang halin naman sa Office of the President (OP) ang P25 million pesos.
Maluwas pa ini sa tig-10,000 pesos nga cash ayuda para sa kada household ukon pamilya.
Suno sa Presidente, nagpanagtag man sang nilibo ka family food packs ang gobyerno nga ginhiwat na bag-o pa man magpanglaslas ang bagyo.
Sa nauna nga 14,000 food packs, ginsiling sang Chief Executive nga napanagtag na ang 7,000 samtang may palaabuton pa nga dugang nga 14,000 food packs nga ginapahayag nga second round sang ayuda para sa mga apektado nga residente.
Kadungan sini, tuman naman ang pagpasalamat ni Batanes Governor Marilou Cayco kay Presidente Marcos sa pagpalangga kag malasakit sini sa mga pumuluyo sang Batanes.
