ROXAS CITY – Natigayon nga madakpan ang ginatudlo suspek sa pagpangawat sang P60,000 nga balor sang broad cock sa Sitio Tabay, Barangay Barra, Roxas City.
Ginkilala ang biktima nga si Shean Batuampo, 37-anyos, kag residente sang Barangay Dayao, Roxas City samtang ang suspek ang ginkilala naman kay Rolen Batobatan, 46-anyos, kag residente sang Barangay Libas sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga takna alas-9:00 sang aga dakop sa akto si Batobatan nga ginakuha ang imported nga broad cock apang sang nabatyagan sini nga may nakakita sa iya madasig ini nga nagpalagyo dala ang ginakawatan.
Natigayon naman nga madakpan ang suspek matapos nga masundan kag nakuha sa posesyon ang nasambit nga imported nga broad cock.
Mahibaluan nga gintuyo pa kun tani sini nga magpalagyo liwat apang natigayon nga mapunggan sang mga tawo sa lugar kaupod ang mga otoridad.
Sa karun, yara na ang nadakpan sa kustodiya sang Roxas City PNP para sa nagakaigo nga disposisyon.
