ROXAS CITY – Tuman ang kalipay nga nabatyagan ni Provincial Administrator Edwin Monares matapos nga nakabaton ini sang sulat nagikan sa grupo sang LGBT community kag fraternity/sorority group nga nagapakita sang suporta sa iya kadungan sang ginapangatubang sini nga mga kontrobersiya.
Suno kay Monares hugot ang iya pagpasalamat sa amo nga mga grupo nga suno sa iya nakakita sang iya maayo nga hinimuan bilang administrador sang probinsiya.
Mahibaluan nga pila ka miyembro sang Sangguniang Panlalawigan ang nagpahayag nga dismayado sila sa trabaho nga ginapakita ni Monares nga nagresulta pa sa pagsumiter ni Board Member Weldie Apolinario sang isa ka open letter nga naka-address sa gobernador nga nagaduso sang pagpa-revoke ukon pag-recall sang appointment sang administrador.
Bangud diri ginahangkat ni Monares ang mga board members nga pasakaan na lamang siya sang reklamo kun may yara sila sang nakita nga mga kasaypanan sa iya nga pagserbisyo.
Ginpanindugan ni Monares nga duha lamang ka indibidwal ang makapahalin sa iya bilang Provincial Administrator.
Una amo ang gobernador nga nag-appoint sa iya sa nasambit nga posisyon kag ang ikaduha kun mapasakaan ini sang panumbungon nga mapahalin siya sang korte.
