ROXAS CITY – Nagpaathag ang anay provincial administrator angut sa ginpapanaug nga notice of suspension sang Commission on Audit (COA) sa mga infrastructure project nga ginpunduhan sadto sang del Rosario administration sa banwa sang Pontevedra kag Dao.
Ginpahayag ni Michelle del Rosario nga na-obligar si anay Governor Antonio del Rosario nga i-bypass si Provincial Engineer Edgar Agana, bangud kasubong nga hungod sa buot sini ang wala pagpirma sang program of works sang tatlo ka mga infra projects nga ginpunduhan na sang anay administrasyon.
Suno kay del Rosario nga aminado ini nga kinahanglan ang rekomendasyon sang provincial engineer antes ma-released ang pondo sa amo nga proyekto.
Apang ginpahayag ni del Rosario nga ba-se sa pagpanalawsaw sini, napagkit sa local government code nga ang gobernador bilang local chief executive sang probinsiya ang may power in control sa tanan nga programa/proyekto/aktibidad sa nasakupan nga lugar.
Suno kay del Rosario nga wala sang nakita nga rason ang gobernador para indi pagdayunon ang proyekto.
Matandaan nga nagpapanaug sang notice of suspension ang COA sa tatlo ka mga infra projects nga ginpondugan sang nagligad nga administrasyon matapos may nakita nga iregularidad ang ahensiya.
