Ginapanindugan sang presiding officer sang Sangguniang Panlalawigan nga nag-agi sa proseso kag gintun-an sang mga miyembro sang Committee on Environment and Natural Resources kag Committee on Laws and Good Governance ang ginpaguha nga report antes gin-aprubahan sa 3rd and final reading ang amendment angut sa ordinansa nga ginapatuman sa quarrying operation sa probinsiya sang Capiz.
Ginpahayag ni Vice Governor James Magbanua matapos nakabaton sang complaint gikan sa alkalde sang Sigma nga nagapangayo sang explikasyon sa pagdakup sa ila
sang CAPENRO bangud sa ila pagpatigayon sang quarry operation nga wala nakakuha sang permit sa gobyerno probinsiyal, gilayon sini ginrefer sa duha ka nahinambitan nga komitiba nga nagpatigayon sang committee hearing sa diin ginpatawag kag nagtambong ang concerned nga mga indibidwal kalakip si Atty Emilyn ‘’Abeb” Depon.
Suno kay Magbanua nga na-estoryahan sa nasambit nga hearing ang isyu kag nagpaguha sang committee report ang concerned nga komitiba.
Nagapati ang opisyal nga maalam kag ginatun-an sang mga board members ang mga ginapapasar ukon gina-aprubahan nga amendments kag ordinansa.
Gin-athag pa ni Magbanua nga ginhatagan pagtamud sang mga miyembro sang komitiba nga amyendahan ang naga-exister nga ordinansa sa quarry operation sa probinsiya agud malikawan ang pamulitika sa pag-isyu sang permit sa magapatigayon sang quarry operation.
Samtang agud masiguro nga indi maabuso ang ordinansa, ang LGU nga magapatigayon sang quarry operation para gamiton sa road rehabilitation ukon pagconstruct sang tulay dapat magsecure sang resolution sa barangay kag Sangguniang bayan, subongman kinahanglan nila nga i-notify ukon impormahon ang CAPENRO kun ano ang ila gina-extract sa quarry operation.
Sa statement ni Atty. Emilyn Depon nga may ginlapas sa Philippine Mining Act ang ginaduso nga amendment sang Sangguniang Panlalawigan, ginpahayag ni Vice Governor Magbanua nga iga-rekomendar sini sa sangguniang panlalawigan nga padalman kag istudyuhan ang isyu kag kun may nakita nga violation, gilayon nga i-call ang attention agud ma-estoryahan.
Gintawag man ni Magbanua nga uncalled for statement sang isa ka department head ang ginbuy-an nga pahayag ni Atty. Depon nga gintiplang ni Board Member Matteo Hachuela ang mga kaupdanan sini nga mga board members nga nag-affirm sa amendment sang ordinansa.
Suno sa opisyal nga importante ang respeto sa kada isa labi na nga mga public servant sila kag ginahimo lamang nila ang ila trabaho nga tuyo nga mapaayo pa ang probinsiya sang Capiz.
