ROXAS CITY, CAPIZ- Nagapadayon ang panawagan sang Department of Health (DOH) sa mga Pilipino nga mag-donate sang dugo bilang kabahin sang kampanya para sa ikaayong-lawas kag kabuhi.
Sa interview sang Bombo Radyo kay Mr. Raymundo Martinez, Administrator sang Philippine Red Cross-Capiz Chapter, iya ginpahayagb nga ang regular nga pag-donate sang dugo ang indi lang makabulig sa mga nagakinahanglan kundi may benepisyo man sa ikaayong-lawas sang donor.
Suno kay Martinez, sandig sa datos sang Philippine Red Cross, kada duha ka segundo, may yara sang isa ka-tawo sa kalibutan ang nagakinahanglan sang dugo. Mahimo ini nga maghalin sa mga pasyente sang cancer, mga naaksidente, nag-bata, ukon nag-agi sa major surgery.
Pahayag pa nya, ang pag-donate sang dugo ay may yara sang mga benepisyo sa ikaayong-lawas sang donor sa diin nagabulig ini sa pagpabilin sang balanse sang iron sa lawas, kag mahimo man nga makabulig sa pag-examine sa estado sang lawas sang donor sa kada mag donate sila sang dugo bangud nga may yara sang libre nga screening.
Nahibaluan nga sang Oktubre 3, 2025, nakabaton sang pasidungog ang Philippine Red Cross Capiz Chapter nagikan sa Department of Health bangud sa madinalag-on nga naimplementar ang National Voluntay Blood Program sa probinsya kun sa diin nga nalab-ot sini ang criteria nga 1% blood collection.
Ginhatagan man pagtamod sang natungdan nga safe ang proseso sang pag-donate sang dugo. Ginagamit lamang ang sterile kag disposable nga kagamitan, rason nga wala sang dapat kabalak-an ang mga may luyag nga magbulig.
Sa nagahilapit nga Dugong Bombo 2025 Blood Letting activity sang Bombo Radyo Philippines, sa pagpanguna sang Bombo Radyo Philippines Foundation Incorporated in partnership with Philippine Red Cross, gina-imbetaran ang tagsa ka mga pumuluyo sang Capiz nga magpasakop sa amo nga aktibidad agud nga mas madamo pagid sang kabuhi ang masugpunan kag masalbar.
Reported by Bombo Sunnie Mae Constantino Batencila
