Nagpanindugan ang provincial administrator nga indi pagsundon ang suhestyon ukon opsyon nga ginpresentar sang chairman sang Committee on Appropriations sang Sangguniang Panlalawigan may kaangtanan sa pagakuhaan sang supplemental budget sang Roxas Memorial Provincial Hospital nga gamiton sa pagbakal sang medical supplies kag oxygen nga kinahanglan sa karon sang mga pasyente.
Sa interview sang Bombo Radyo kay Edwin Chinel Monares, ginpahayag sini nga wala sang deber si Board Member Jonathan ‘’Sonny’’ Besa nga magtan-ay sang ginasiling pondo sang iya talatapan, bangud ini ang pondo sang ehekutibo.
Ginhangkat man ni Monares, si Besa nga kun luyag sang nasambit nga board member nga magdonar kasubong sa ila ginasiling inisyatibo sang Sangguniang Panlalawigan nga gindonar ang pondo sang ila talatapan para masabat ang immediate need nga pagbakal sang medical supplies kag oxygen, dapat maghalin ini sa iya personal nga bulsa kag indi pagdiktahan ang ehekutibo kun diin sarang makakuha sang pondo, agud masabat ang kinahanglanon sang ospital.
Gin-athag pa sang opisyal nga may lamud pamulitika ang ginahimo sa karon ni Besa nga pag-ipit sa ehekutibo.
Ginhimo ni Monares nga halimbawa ang pagpasumiter ni Besa sang dokumento sang pamunuan sang RMPH, agud ma-tsekyar sang sanggunian, sa diin indi nila pag-aprubahan ang ginapangayo nga supplemental budget sang ospital kun indi makumpleto ang mga dokumento.
Nahibaluan gikan kay Monares nga luyag lamang nila kuntani nga unahon ang sweldo sang mga medical frontliners bangud may yara man sila sang makuhaan nga pondo para sa pagbakal sang medical supplies, apang kasubong nagapakatig-a si Besa.
