ROXAS CITY, CAPIZ- Gin-athag sang pamunuan sang Traffic Management Unit (TMU)-Roxas City ang may kaangtanan sa pag-parking sang mga market goers sa merkado publiko, Teodoro Arcenas Trade Center, Roxas City.
Ini ang kasunod sang pagpa-Bombo sang isa ka Market goer nga nagpahayag sang iya nga pagkadismayado sa parking boy sa amo nga merkado.
Sa interview sang Bombo Radyo kay Mr. Gonzalo Andrada, Head sang Traffic Management Unit (TMU)-Roxas City, ginpahayag nga ang pag-parking sa mga market goers ang ‘first come, first serve’ kag wala sang bayad.
Dugang pa sini, nga ang mga otorisado lang nga magmanihar sang dalagan sang trapiko amo ang mga katapo sang TMU kag indi ang mga parking boy bangud wala ini sang madamo nga ihibalo may kaangtanan sa trapiko.
Sa pihak nga bahin, indi luyag sang talatapan nga may mga parking boy sa amo nga merkado bangud suno kay Andrada, perwisyo sa iban nga mga market goers kag kaangay ginaangkon na sang mga parking boy ang parking area kag kaangay may nagakatabo na nga kada parking may bayad sa diin suno sa iya nga indi dapat, bangud nga libre lang ang pag parking.
Samtang, naghagan-hagan naman ang traffic sa amo nga merkado sumugod nga ginhalin na pasulod ang mga sidewalk vendors kag suno sa iya, nag-angkon sila sang kadayawan sa amo nga direktiba.
