Wala sang kumpas ni Presidente Ferdinand Marcos Jr., ang pag-urong ni Senate President Francis “Chiz” Escudero sa Hunyo 11 sang presentasyon sang articles of impeachment batok kay Vice President Sara Duterte.
Orihinal na natalana subong, Hunyo 2, ang presentasyon sang House prosecution panel sang pito ka articles of impeachment batuk kay Duterte kag sa Hunyo 3 man ang pagco-convene sang Senado bilang impeachment court.
Sa isa ka press conference, ginklaro sang Senate President, nga unahon nila ang priority bills nga kinahanglan mapapasar antes magtakop ang 19th Congress.
Hugot man nga ginsiling sang senador nga wala sang kahilabtanan ang pagpabilin nya bilang liderato sang Senado sa desisyon sa iskedyul sang impeachment.
Samtang, gin-ako man sini nga nagapakighinun-anon ini sa mga kaangay nya senador nga iya mga abyan umpisa sa 19th kag 20th Congress.
Apang, suno sa iya, madugay pa ang 20th Congress para istoryahan ang senate presidency.
Nanindugan man si Escudero nga ang plenaryo ang magabutang sang dalagan sang impeachment trial batuk kay Duterte.
Ginpahayag man sang senador nga apisar mahimo sang Senate President ang pagtalana sang iskedyul sa umpisa, ang plenaryo man sa gihapon ang pinakamataas nga bahin nga magdesisyon kun paano ipatigayon ang mga proseso kag direksyon sang impeachment court.
Ginklaro sang mamalidha nga ang pag-urong sang presentasyon sang articles of impeachment indi pabor ukon kontra sa prosekusyon kag defense bangud indi man sini ginapamatukan ang kapasidad sang Senado nga iduso ang impeachment trial.
Ginsigurado man sang senador nga magtililipon ang Senado bilang isa ka impeachment court kon madesisyunan na ini sang plenaryo.
