ROXAS CITY, CAPIZ- Hugot nga ginadumilian sang mga otoridad ang pagbaligya sang mga palupok ukon firecrackers sa mga menor de edad kadungan sang nagahilapit nga holiday season.
Sa interview sang Bombo Radyo kay Police Captain Merry Chris Dela Cruz, Public Information Officer sang Capiz Police Provincial Office, iya ginpahayag nga sandig sa Republic Act No. 7183 ukon ang Firecracker Act, may mga limitasyon sa paggamit sa palupok kag isa na dira ang nasambit nga pagdumili sang pagbaligya sa mga pamatan-on.
Suno kay Dela Cruz, katuyuan sang nasambit nga pagdumili amo agud nga masigurado ang kaluwasan sang mga pamatan-on bangud nga sang tinalikdan nga mga pagselebrar sang holiday season, madamo ang nabiktima sang palupok. May yara sang may nautdan kuramoy, napilasan sa pila ka bahin sang lawas, kag may yara pa sang nadulaan sang panan-awan.
Pahayag niya, may pila ka mga palupok ang mahimo lamang nga ipalupok apang sang mga katigulangan kag indi sang mga pamatan-on, ini amo ang baby rocket, bawang, small triangulo, pulling of strings, kag iban pa nga manubo ang risk level. Samtang, hugot naman nga ginadumilian ang paggamit sang mga delikado nga palupok kasubong sang super lolo, atomic big triangulo, goodbye Philippines, kag whistle bomb.
Mahimo naman nga mapamatbatan sang P20,000 tubtob P30,000 nga balor sang kwarta kag posibilidad sang pagkapreso ang magabayolar sa amo nga layi.
Nagpanawagan naman ang natungdan nga kun mahimo, magpangita nalang sang mga alternatibo nga mga pangpagahod para sa pagselebrar sang bag-ong tuig.
Reported by Bombo Sunnie Mae Constantino Batencila
