ROXAS CITY – Kritikal sa ospital ang backrider sang motorsiklo samtang ginabulong sa ospital ang driver sini matapos nagbunggu-anay sa dalan sang isa ka salakyan sa Barangay Balijuagan, Roxas City
Nag-angkon sang patal nga pilas sa ulo kag lawas si Medelyn Baydo 23-anyos samtang pilas sa magkatuhay nga bahin sang lawas ang naangkon sang driver sang motorsiklo nga si Arvin dela Luna 24-anyos sang Barangay Basiao, Ivisan, Capiz matapos nagbunggu-anay ang salakyan nga ginamaneho ni Jason Cartujano sang Barangay Balijuagan, Roxas City.
Sa interview sang Bombo Radyo Roxas sa suspek nga si Cartujano, ginpahayag sini nga pabalik na ini sa Roxas City sang nagluntad ang aksidente.
Suno pa kay Cartujano magaliko na ini kuntani, apang wala ginalauman ang pag-overtake sang motorsiklo sang mga biktima.
Kasunod sini, ang pagbunggo sang motorsiklo sa nawala nga bahin sang bumper sang salakyan sa diin bangud sa mabaskog nga impact, nagtabog ang mga biktima kag nag-igo ang ulo ni Baylo sa semento.
Gilayon nga gindala sa ospital ang mga biktima samtang yara na sa kostodiya sang mga pulis si Cartujano.
