Ginpanubuan sang Philippine Amusement and Gaming Corporation (PAGCOR) ang ginabayaran nga fee rate para sa mga Electronic Game (E-Games) sa pungsod.
Gikan sa 35%, ginhimo na lamang ini nga 30%.
Ginbuhinan man sang PAGCOR ang rates para sa mga e-games nga gina-operate sang mga integrated resort padulong sa 25%.
Ginpahayag ni PAGCOR Chairperson kag CEO Alejandro Tengco nga ang nasambit nga tikang ang agud makahimo sang mas paborable nga regulatory environment pinaagi sa pagganyat sa mga unregistered online gaming operator nga magsulod na lamang sa legal market.
Suno diri nga isa ini ka pamaagi agud mabatuan ang illegal gambling operations sa bug-os nga pungsod.
Suno pa kay Tengco, ang pagbuhin sa ginabayaran nga fee rate ang magadul-ong sa mga operator sang mas madamo nga resources para sa ila nga marketing samtang ginapunggan man sini ang closure ukon dalayon nga pagsarado sang mga e-games operator.
Sa mga nakaligad nga tuig, tuman kataas suno diri ang ginakulekta nga fee gikan sa mga e-games companies gani nabalabagan ang expansion ukon pagdako sang mga ini.
Sa karon, nakapaguwa na ang PAGCOR sang kabug-usan nga 1,188 ka lisensiya para sa nagkalain-lain nga on-site kag online gaming. Ini ang mas mataas sang 13.57% kun ikumparar sa 1,046 ka lisensiya nga nahatag sadtong 2023.
