ROXAS CITY – Ginrekomendar sang Provincial Risk Reduction And Management Council (PDRRMC) sa Sangguniang panlalawigan ang pagdeklarar sang state of calamity sa bug-os nga probinsya bangud sang epekto sang African Swine Fever (ASF).
Sa pahayag ni Atty Luvim Amores Public Information Officer Capiz Provincial Government nga base sa datos as of June 6, 2023, 242 sa kabug-usan nga 473 ka mga kabaranggayan sa probinsya ang apektado na sang ASF.
Suno pa kay Amores nga kinahanglan nga mapaidalom sa State of calamity ang probinsya agud nga magamit na ang Calamity fund para sa mga apektado nga mga lugar.
Pananglitan nga mapaidalom ang probinsya ipatuman man sang gobyerno ang prevention, monitoring kag control sa mga prime commodities.
Natalana naman nga isumiter ang resolusyon nga gindihon sang PDRRMC sa sangguniang panlalawigan subong nga adlaw sa diin posibli magapatigayon sang special session ang Sangguniang Panlalawigan agud hatagan pagtamod ang natuhoy sa pagdeklarar sang state of calamity sa bug-os nga probinsya.
