ROXAS CITY – Ginakabalak-an sang City Government ang padayon nga pagdinamo sang mga Badjao sa syudad apisar nagnubo na ang kaso sang Covid.
Ini ang ginpahayag ni Ronald Amigo, Assistant Department Head sang Roxas City Government sang mainterview sang Bombo Radyo.
Suno diri, nadula na ang grupo sang mga Badjao nakaligad ang duwa ka-tuig matapos nga ginpaidalum sa lockdown ang pila ka mga lugar sa pungsod kalakip na sa may bahin sang Mindanao kun sa diin sila nagapuyo .
Isa nga nakita nga rason ni Amigo nga nagpanumbalik ang mga ini sa syudad bangud madamo ang nagahatag sa ila nga mga pumuluyo.
Bangud diri, nakig-angut ini sa talatapan sang CSWDO, pina-agi kay Ms. Lorelie Assuelo agud hinalaan ang mga tikang nga ipatuman agud mapabalik ang grupo sang mga Badjao sa ila nga lugar.
Panugyan sini nga kun tani may yara sang indibidwal nga nakahibalo sang panghalambalon sang mga ini agud ipahibalo sa ila ang luyag nga ipalab-ot kag mahibaluan ang rason sang ila pagtinir.
Pahayag sang opisyal, ang maayo nga solusyon diri ang ma-adress sang gobyerno nasyunal ang isyu bangud indi lamang sa syudad ang mga ini makita apang amu man sa iban nga bahin sang pungsod.
Ginaganyat sini ang pumuluyo nga kun mahimo indi nalang pagtagaan ang mga Badjao indi bangud sa indi luyag magbulig apang agud magbalik na sila sa ila ginhalinan.
