ROXAS CITY- Indi maka-apekto sa ika-ayong lawas ang nagduging nga African Swine Fever sa pila ka mga baboy sa probinsya.
Sa interview sang Bombo Radyo kay Atty. Luvim Amores HRMO/Information Officer ginsiling sini nga padayon ang ila nga pagmonitor sa mga karne nga nagaguha kag nagapasulod sa probinsya ilabi na ang karne sang baboy.
Matandaan nga sang damlag lang ginkumpirmar sang Acting Municipal Agriculturist sa banwa sang Maayon nga positibo ang apat ka blood samples sang baboy sa African Swine Fever (ASF), sandig sa ginpaguwa nga abiso sang Department of Agriculture-Western Visayas.
Nahibaluan nga nagbakal sang karne sang baboy ang taga-Canapian, sa Sara, Iloilo bangud ginpahayag sang residente nga barato ang ila nga baligya.
Bangud sini gilayon nga ginpahulag sang Local Government Unit sang Maayon ang ila ASF Task Force agud magmonitor sa mga kasapatan.
Nagrekomendar man suno diri ang Capiz Provincial Government nga mag-implementar sang gilayon nga quarantine kag disease control measures sa mga apektado nga lugar, pagpatigayon sang disease investigation, ilabi na ang contact tracing, intsakto nga pagkuha sa mga apektado nga baboy kag pag-dispose sa mga apektado nga lugar, pagpatigayon sang field surveillance kag pagkolekta sang sample sa tamam mga farm households nga prone sa nasambit nga sakit sa sulod sang 1 kilometer quarantine zone nagikan sa apektado nga lugar kag pagpakig-angut sa mga loval government unit kag iban pa nga ahensya para sa pagpatuman sang iban pa nga kinahanglan nga tikang sa pagkontrol sang sakit sa apektado nga lugar nga nagikan sa gintalana sang Bureau of Animal Industry.
Suno pa kay Amores nga mahimo sa gihapon nga makabakal kag magkaon sang karne sang baboy apang siguraduhon lamang nga may yara ini sang tatak pamatuod nga nag-agi sa slaughter house.
Panugyan sini sa mga konsumedor nga likawan magbakal sa mga nagabaligya sa kilid sang dalan kag hibaluon kun sa diin nagikan ang karne.
