Ginakonsiderar na sang Korte Suprema ang paggamit sang Artificial Intelligence (AI) para sa pagdesisyon kag pagmonitor sang civil kag criminal cases.
Sa hearing sang panukala nga 2025 budget sang Judiciary, ginsiling ni Supreme Court Administrator Raul Villanueva nga maluwas sa legal research, pwede na nga gamiton ang AI sa pagkuha sang datos para sa pagbalay sang mga desisyon.
Maluwas diri, pwede na man nga gamiton ang AI sa pagmonitor sang mga huwes kag mahistrado natuhoy sa status sang mga kaso partikular ang mga madugay na sa korte.
Sa karon, nagadevelop na ang Korte Suprema sang voice to text transcription agud samtang nagahatag sang panaysayon ang testigo, nagarecord kag gina-transcribe na ang mga ginahambal sini.
Ginatun-an na man ang paggamit sang AI nga pwede nga mag-translate gilayon sa English sang mga testimonya nga ginahimo sa Filipino ukon sa iban nga dayalekto.
Nagpahayag naman sang suporta diri si Senate Finance Committee Chairperson Grace Poe kadungan sang paandam nga indi masyado nga magdepende sa AI agud indi gihapon madula ang human side sa mga desisyon sa korte.
