ROXAS CITY – Indi mandatory ang paggamit sang face mask sa Germany sa pihak sang mga recorded cases sang coronavirus disease 2019 sa pungsod.
Sa report ni Bombo International Correspondent Chris Maike, ginpahayag sini nga nagagamit lamang sang face mask ang isa ka tawo kun infected ini agud indi maka laton sa iban.
Kun indi mandatory ang paggamit sang face mask sa pila ka bahin sang Germany hugot naman ang pagpatuman sang social/physical distancing kag ginadumilian ang pagpadulong sa pampubliko nga lugar.
Aminado ini nga ginadumilian man ang pagbiyahe sa iban nga estado sang Germany bilang kabahin sang preventive measures para indi maglapta ang mikrobyo sang COVID-19 nga tobtob sa karon wala pa sang bulong ukon bakuna.
May libre nga sakay sa mga public transport kasubong sang bus kag train para hindi mabudlayan ang publiko.
Ginakabig man nga paglapas sa laye kun makita nga wala ginasunod ang social distancing sa diin magamulta sang 250 euro ang madakpan kag maaresto.
Samtang magabukas na ang pila ka mga stores sa masunod nga semana nga temporaryo ginsaraduhan man bangud sa COVID-19 pandemic.
Apang magapabilin nga sarado ang mga eskwelahan tobtob indi matapos ang peligro nga dala sang coronavirus disease 2019.
