Pagguwa-sulod sang baboy sa brgy Quinabonglan, Maayon, hugot nga ginabantayan

ROXAS CITY – Hugot nga ginabantayan sang barangay council ang pagguwa kag pagsulod sang baboy sa Barangay Quinabonglan, Maayon, Capiz.

Ini ang matapos nagpositibo sa African Swine Fever (ASF) ang test samples sang mga baboy nga nagikan sa Brgy Canapian, sang nasambit nga banwa.

Sa interview sang Bombo Radyo kay Punong Barangay Ferdinand Tumlos, ginsiling sini, nga hugot nga ginadumilian ang pagsulod sang karne ukon buhi nga baboy agud malikawan nga maglapta pa ang nasambit nga balatian.

Aminado man ini nga sang wala pa nagpositibo ang Canapian sa ASF, nagabakal sila sang baboy sa Iloilo.

Apang sa karon, bantay-sarado na sila sa lugar ilabi na nga tuman nga apektuhan diri ang mga hog raisers.