Ginapanindugan sang chairman sang Committee on Appropriations sang Sangguniang Panlalawigan nga indi sila ang kabangdanan sang delay ukon pagka-atrasar sa ginapangayo nga pondo sang Roxas Memorial Provincial Hospital (RMPH) para gamiton sa sweldo sang mga empleyado kag pagbakal sang medical supplies kag oxygen nga kinahanglanon sang mga pasyente.
Ginpahayag ni Board Member Jonathan ‘’Sonny’’ Besa kun nagtuhaw ang kasubong sini nga problema sa RMPH, ini bangud sa kahinay sang pamunuan sang amo nga ospital sa pagsumiter sang mga dokumento nga ginapangayo sang Sangguniang Panlalawigan.
Suno sa opisyal nga trabaho kag obligasyon sang Sangguiang Panlalawigan nga pagayuon kag tsekyaron ang dokumento nga ginasumiter sang RMPH, agud matul-id kun gingamit sa dapat kagastuhanan ang una nga pondo nga ginpa-in para sa nasambit nga kinahanglanon.
Gindugang pa ni Besa nga nakasalalay sa pamunuan sang ospital ang kadasigon nga pag-aksyon sang sanggunian sa ila ginahinyo, depende kun san-o makumpleto ang ginapangayo nga dokumento sang provincial board.
Apang nagpamat-ud si Board Member Besa nga indi nila pag-aprubahan ang ginapangayo nga supplemental budget sang RMPH kun indi makumpleto ang mga dokumento.
Samtang ginapanindugan sang opisyal ang nangin pahayag sang budget officer nga bastante ang sweldo sang mga medical frontliners kag job order employees sang RMPH tobtob sa Septiembre 30.
