ROXAS CITY – Nadula ang pagkabalaka sang isa ka amay matapos mabatian ang tingog sang anak nga nakaluwas sa nasunog nga Grenfell Tower sa West London.
Gin-ako ni Mr. Cristituto Daes, amay sang Capizeña nga si Gina Quillano, naga-estar sa Grenfell Tower nga indi ini makakaon kag makatulog sang makalab-ot sa iya ang balita bangud sa tuman nga pagkabalaka sa posible natabo sang anak.
Nadula lamang ang kulba sa iya nga dughan sang magtawag si Gina kag ginsugid nga nakaguwa sila sang mga pakaisa nga kaupod sini sa apartment sang magbugtaw sa aso kag init gikan sa kalayo sa 10th floor.
Sa karon temporaryo sila nga nagaestar sa simbahan kag nagasalig lamang sa pagkaon kag bayo nga ginahatag sa ila.
Passport lamang sini ang iya nadala pagguwa sa edipisyo bangud sa pagdali.
Nahibaluan nga lima na ka tuig nga nagatrabaho sa London si Gina bilang domestic helper.
