ROXAS CITY, CAPIZ – Indi lamang mga internal nga parte sang lawas ang apektado sang diabetes, kundi pati man ang mga mata suno sa isa ka Medical Expert.
Sa interview sang Bombo Radyo Roxas kay Dr. Archimedes A. Apa-ap, Medical Officer III sang Roxas Memorial Provincial Hospital, iya ginpaathag kun paano nagatuga sang komplikasyon sa mata ang mataas nga blood sugar.
Suno kay Dr. Apa-ap, ang diabetes mahimo nga makaguba sa magagmay nga ugat sa retina, nga amo ang parte sang mata nga responsable sa maathag nga panan-awan. Ginatawag ini nga diabetic retinopathy, isa ka kondisyon nga amat-amat nga nagapanubo sang kalidad sang panan-awan kag posible nga magresulta sa pagkabulag kun indi ini matatapan.
May mga sintomas nga mahimo nga maeksperyensyahan kasubong sang maburon nga panulok, ukon pagtuhaw sang mga anino ukon “floaters”. Apang may mga kaso man kun sa diin bisan wala sang nabatyagan nga sintomas, amat-amat man nga nagakaapektuhan ang mata.
Bangud sini, ginpahayag sang natungdan nga importante nga mag-angkon sang regular nga eye check-up, ilabi na sa mga tawo nga may diabetes.
Dugang pa ni Dr. Apa-ap, mas mataas ang tsansa nga mag-angkon sang komplikasyon sa mata kun indi kontrolado ang blood sugar, may mataas nga presyon, nagapanigarilyo, kag indi regular sa pagpakonsulta sa doktor.
Agud malikawan ang paglala sang kondisyon, importante ang insakto nga pag-atipan sa ikaayong lawas kasubong sang pagkaon sang masustansya, regular nga ehersisyo, kag hugot nga pagbantay sa blood sugar.
Ginarekomenda man nga ang mga may diabetes ang magpa-check sang ila nga mata isa ka bes kada tuig.
Kun sa tion nga may komplikasyon na, may mga pagbulong nga mahimo nga patigayunon kasubong sang operasyon kag may posibilidad man nga mag-ayo pa ang panan-awan kun matatapan sang timprano ang kondisyon.
Pahanumdom ni Dr. Apaap sa mga may diabetes kag sa ila nga pamilya nga indi pagbalewalaon ang ikaayong lawas sang mata. Sa insakto nga pag-atipan, paghalong, kag regular nga pagpakonsulta kag exercise mahimo nga malikawan ang seryoso nga komplikasyon kasubong sang pagkabulag.
– With an interview from Bombo Jessa Mae Siman De Los Santos
