ROXAS CITY – Natumod na ang pagkakilanlan sang lalaki nga nagpakuno-kuno delivery rider kag nagtaban sang masobra P30,000 nga balor sang mga parcel nga nasulod sa sako sang Biyernes, Mayo 17 sa Barangay Poblacion, Pilar, Capiz.
Sa nakuha nga impormasyon sang Bombo Radyo sa Pilar Municipal Police Station, ginpadulungan sang mga kapulisan ang balay sang suspetsado kaupod ang biktima kag diri positibo nga ginkumpirmar mismo sang misis sang suspek nga ang lalaki sa CCTV nga nagkawat sang parcel amu ang iya bana.
Apang humalin pa kahapon wala na nakapauli ang suspek sa ila nga balay.
Matandaan, sandig sa kuha nga CCTV, naabtan sang biktima nga si Nodnod Ajesta ang suspek nga tuyo kuntani tabanon ang iban nga parcels, apang wala nagsulod sa paino-ino sang biktima kun ano ang tuyo sang suspek bangud sa pag-abi nga kasubong niya ini nga delivery rider.
Ulihe na natalupangdan sang biktima nga gintaban na sang suspek ang isa ka sako nga parcel nga igadeliver niya kuntani sa amu nga adlaw.
Sa karon, desidido nga magpasaka sang kaso ang biktima batok sa suspek.
