Nagpanindugan si Sen. Sherwin Gatchalian nga indi bastante para sa mga e-wallet firm nga kuhaon ang mga e-gambling links nga nagaangot sa ila, base sa mando sang Bangko Sentral ng Pilipinas (BSP).
Apisar nga gin-ako sang senador nga makabulig ini sa pagpanubo sang numero sang mga tawo nga naadik kag nagahampang sang e-gambling, ginpahayag sini nga kinahanglan ang mas mabaskog nga pamaagi agud ma-regulate ang online gambling.
Ginrason sang senador nga wala pa lubos nga nautod ang link ukon koneksyon sa tunga sang e-wallets kag e-gambling apps.
Suno sa iya, ang mga manugpusta mahimo gihapon magkonektar sang ila mga e-wallet kag savings account sa mga gambling apps mismo, gamit ang mga kompyuter, sa pagbutang sang mga pusta.
Ginsiling sini nga ang ginkakas lang diri amo ang In-App capability ukon ang gilayon nga pagkonektar sang mga e-wallet sa gambling sites nga direkta makita sa mga e-wallet sites.
Dapat suno sa iya nga untatan na ang paggamit sang e-wallet para sa pagtaya, kag dapat matapna ang sobra nga pag-abuso sini sa electronic gambling operations.
Ang tagsa ka e-wallet firm may tubtub las 8 sang gab-i (Agosto 16) sa pag-disconnect sang e-gambling links, base sa nauna nga mandu sang BSP.
Pila ka mga kumpanya ang nagpromisa na nga sundon ang nasambit nga mando.
