ROXAS CITY – Nagsugod nga maglain ang paminsaron sang menor de edad nga nagwaras dala ang duha ka mga kutsilyo sa Roxas City Integrated Transport Terminal (RCITT), Pueblo De Panay, sumugod sang nakit-an ang kamatayon sang ila amay.
Ini ang ginpahayag ni alyas Lyn, magulang ni alyas Raprap sang mainterview sang Bombo Radyo.
Suno kay alyas Lyn, ika-anum si Raprap sa ila nga mag-ulutod kag sumugod sadtong 2018 nakit-an nila ang amat-amat nga pagbag-o sang batasan sini kung sa diin madali na ini nga magpangakig kung hambalan kag samtang nagadugay nagalala nga nagalala ang iya batasan.
Gina-ako man suno diri ni Raprap nga siya mismo indi makaintindi sa lakat sang iya paminsaron kag indi niya ini makontrol.
Ini man suno diri ang una nga tion nga naghimo sang kaangay nga butang ang ila manghod kung sa diin may bitbit nga matalum nga hinganiban apang madamo na nga beses nga nangin agresibo ini apang gilayon man nga nagapaukoy.
Mahibaluan nga nakainum sang makahulubog nga ilimnon si Raprap sang mag-abot sa ila karenderya nga nagikan sa puluy-an sang ila lola sa Barangay Cogon, Roxas City.
Apang sang mag-abot ang ila pakaduha agud kun tani magsukam kung sa diin na ang kwarta sang ila lola bangud ginapahayag nga ginkuha niya ini kag gingamit sa pagbakal sang makahulubog nga ilmnon, didto na nga nangin agresibo si Raprap kag indi na makontrol ang iya kaugalingon nga gilayon nagkuha sang kutsilyo kag nagsiling nga magapakamatay na lamang siya.
Bangud sini, gintinguhaan pa sang iya iloy nga istoryahon si Raprap apang wala na ini nagapati tubtob nga natigayon nga makuha sa iya ang kutsilyo sa bulig sang iya magulang nga naghakos kag nagpugong sa iya.
Sa karun, plano sang ila pamilya nga ipacheck-up si Raprap agud mahibaluan kung anu ang maayo nga buhaton kag agud liwat nga magpanumbalik sa normal ang paminsaron sang ila manghod.
