ROXAS CITY, CAPIZ- Ginakabig nga isa ka dako nga bulig sa paglikaw sa food contamination kag nagkalain-lain nga mga balatian ang pagpabilin sang mga pagkaon nga malimpyo.
Sa interview sang Bombo Radyo kay Engineer Joemarie Eugene L. Gonzales, Sanitation Inspector IV sang Provincial Health Office, iya ginpahayag nga masobra 600 million ka tawo sa bilog nga kalibutan ang nagakaapektuhan sang unsafe food kada tuig.
Suno kay Gonzales, subong nga bulan sang Oktubre, ginaselebrar man ang malapnagon nga kampanya natuhoy sa Food Safety Awareness nga ginapangunahan sang Department of Health (DOH) kag Food and Drug Administration (FDA).
Katuyuan sang nasambit nga programa nga palaparon ang ihibalo sang publiko sa insakto nga paghawid, pagluto kag pagtago sang pagkaon agud malikawan ang foodborne illnesses kasubong sang food poisoning, diarrhea, kag iban pa.
Pahayag nya, yari ang mga dapat nga himuon: una, ipabilin nga malimpyo ang palibot kag ang mga pagkabutang, ika-duha, i-separate ang hilaw kag luto nga pagkaon, ikatatlo, lutuon sang maayos ang pagkaon, ikaapat, siguraduhon nga yara sa insakto nga temperature ang pagkaon, ka gang ikalima, maggamit sang malimpyo nga tubig kag mga panakot.
Dugang pa sang natungdan, ang malimpyo nga pagkaon, indi lamang agud makalikaw sang mga balatian, kundi isa man ini sa paghatag sa lawas sang tawo sang nutrisyon nga kinahanglan sini.
Interviewed by Bombo Jessa Mae De Los Santos
