ROXAS CITY – Indi pa makabalik sa Capiz Rehabilitation Center (CRC) ang kontrobersiyal nga sanday Provincial Jail Warden Arjuna Yngcong kag Administrative Officer Andreo Llaver tobtob wala pa mapatuman ang rekomendasyon sang fact finding committee sa pagpanguna ni Francisco ‘’Bobot’’ Dariagan kasunod sang alegasyon nga anomaliya kag iregularidad nga nagakahinabo sa sulod sang facilidad.
Ginpahayag ni provincial administrator Dr. Edwin Chinel MOnares sa pihak nga ginpaguwa na sang fact finding team ang ila imbestigasyon kag rekomendasyon sa kontrobersiya nga gindalahigan sang duha ka opisyal, ginpakamaayo nga magpabilin sila anay sa Provincial General Services Office (PGSO).
Kalakip sa gin-imbestigahan ang natuhoy sa hazard pay sang mga personnel sang CRC nga gin-alegar ginbuhinan ni Yngcong.
Apang nagguwa sa imbestigasyon nga may kasugtanan nga equal sharing sila sa ila hazard pay kag wala sang sanction nga ginrekomendar ang komite kay Yngcong.
Sa isyu naman kay Llaver nagaguwa nga indi verified ang complaint angut sa paghimo sang indi maayo sa mga asawa ukon partner sang mga preso ni Llaver.
Apang may duha ka mga kababainhan nga nagapanindugan sa ila testimoniya batuk kay Llaver.
Ginrekomendar sang komite nga ipabilin sa PGSO ukon i-assign sa iban nga talatapan sang provincial government si Llaver kag ginpasa nila sa gobernador kun may balasehan ang mga alegasyon batuk kay Llaver.
Wala naman sang may nakita nga mabakud nga ebedensiya ang miyembro sang komite sa ila imbestigasyon angut sa pagsulod sang droga sa facilidad kag nangin rekomendasyon ang random drug testing kag pagpatigayon sang surpise visit.
Napamatud-an man sa imbestigasyon ang paghupot sang baboy kag manok kag ang punong sa sulod sang facilidad.
Nangin rekomendasyon sang komite ang dalayon nga pagdumili sa paghupot sang mga kasapatan sa facilidad kag kinahanglan nga mapahamtangan sang CCTV ang facilidad agud makita kun ginapatuman ang mga polisiya kag pagsulundan sang gobyerno.
Sa pihak nga bahin, ginkumpirma ni Monares nga mismo si Mr. Francisco Bobot Dariagan ang nagrequest nga i-pull out ini sa Human Resource office agud maka-concentrate ini sa iya trabaho sa Internal Audit Office.
